Treoirlínte maidir le Toghcháin Pharlaimint na hEorpa 2009

3B. Suimeanna arna sannadh ag iarrthóirí do pháirtí polaitíochta

3.5 I gcás go bhfuil iarrthóir san iomaíocht ag an toghchán thar ceann páirtí polaitíochta, féadfaidh sé nó sí cuid dá t(h)eorainn chaiteachais reachtúil a shannadh don pháirtí go gcaithfidh gníomhaire náisiúnta an pháirtí ag an toghchán é.

3.6 Níl aon oibleagáid ar iarrthóir faoin reachtaíocht aon chuid dá t(h)eorainn chaiteachais a shannadh don pháirtí. Dá ndiúltódh gach iarrthóir de chuid páirtí ag an toghchán aon chuid dá dteorainn chaiteachais a shannadh don pháirtí, ní bheadh cead ag an ngníomhaire náisiúnta aon chaiteachas a tharraingt air nó uirthi féin ag an toghchán, seachas mar dhuine arna údarú ag gníomhaire toghcháin iarrthóra chun amhlaidh a dhéanamh. Is dócha, áfach, go dtiocfaidh na páirtithe ar shocrú éigin le hiarrthóirí ina leith sin. Is é an t-aon chaiteachas a bhfuil cead ag páirtí a dhéanamh ná suim na méideanna atá sannta don pháirtí ag a iarrthóirí ó theorainn aonair na n-iarrthóirí.

Sampla: Dá mbeadh 4 iarrthóir ag páirtí agus iad ag dul san iomaíocht sa toghchán agus má shannann gach duine díobh €100,000 don pháirtí óna dteorainn chaiteachais aonair, bheadh gníomhaire náisiúnta an pháirtí i dteideal €400,000 a chaitheamh ag an toghchán san iomlán. Bheadh laghdú €100,000 déanta ar shuim na teorann a bheidh ar fáil le caitheamh ag gníomhaire toghcháin gach iarrthóir dá thoradh.

3.7 Ní dhéantar forálacha sonracha san Acht maidir le cathain ar chóir na suimeanna comhaontaithe a shannadh don pháirtí. Ní choisctear ath-idirbheartaíocht leis an Acht faoi shuimeanna comhaontaithe a bheidh le sannadh. Molann an Coimisiún um Chaighdeáin do ghníomhairí náisiúnta a chinntiú go gcomhaontaítear le gach iarrthóir na suimeanna a bheidh le sannadh sula dtarraingeoidh an gníomhaire náisiúnta nó gníomhaire toghcháin an iarrthóra aon speansais air nó uirthi féin.

3.8 Tá sé ina cheangal san Acht nach mór an tsuim a bheidh le sannadh don pháirtí a chomhaontú i scríbhinn. Ba chóir mar sin, go luafaí go soiléir sa chomhaontú scríofa an tsuim arna sannadh don pháirtí. Ba chóir go mbeadh sé sínithe ag an iarrthóir agus ag oifigeach cuí páirtí. I gcás go ndéantar ath-idirbheartaíocht faoi shuimeanna ina dhiaidh, ní mór comhaontú scríofa nua a dhréachtú.

3.9 Ceanglófar ar an iarrthóir cóip den chomhaontú scríofa a thabhairt dá g(h)níomhaire toghcháin chun é a chur ar fáil don Choimisiún um Chaighdeáin in éineacht le Ráiteas Speansas Toghcháin an ghníomhaire. Ní cheanglófar ar ghníomhairí náisiúnta cóipeanna de na comhaontuithe scríofa a chur ar fáil in éineacht lena Ráitis Speansas Toghcháin. Ba chóir, áfach, go gcoinneodh gníomhairí náisiúnta cóipeanna de na comhaontuithe scríofa.

Back to contents