Oifigigh Iomchuí na bPáirtithe Polaitiúla

Foráiltear, in Alt 71 den Acht Toghcháin 1997, arna leasú, (an tAcht) nach mór do gach páirtí polaitiúil Oifigeach Iomchuí a cheapadh. Tá dlite ar an Oifigeach Iomchuí faoin Acht roinnt feidhmeanna a dhéanamh mar seo a leanas:

• Tá an tOifigeach Iomchuí freagrach as Ráiteas Síntiús bhliantúil an pháirtí a chur ar fáil don Choimisiún um Chaighdeáin in Oifigí Poiblí (Coimisiún na gCaighdeán).
• Sa chás gur páirtí atá i gceist atá incháilithe d’fhonn airgeadú a fháil ón Stát faoin Acht, tá an tOifigeach Iomchuí freagrach as an Ráiteas faoi Chaiteachas ar Airgead ón Státchiste móide tuarascáil an iniúchóra a théann leis sin a chur ar fáil do Choimisiún na gCaighdeán.
• Ní mór don Oifigeach Iomchuí sonraí a chur in iúl do Choimisiún na gCaighdeán ar bhonn bliantúil maidir le haon bhrainse nó fo-eagras de chuid an pháirtí atá ina nAonaid Chuntasaíochta chun críche an Achta agus sonraí a chur ar fáil maidir leis an duine freagrach i gcás gach Aonad Cuntasaíochta acu.

Ní mór ainm agus seoladh Oifigeach Iomchuí an Pháirtí a chur in iúl do Choimisiún na gCaighdeán. Sa chás gur páirtí atá i gceist atá incháilithe d’fhonn airgeadú a fháil ón Stát faoin Acht, ní mór sonraí faoin Oifigeach Iomchuí a chur in iúl don Aire Airgeadais chomh maith.

Sa chás, ag am ar bith, nach mbíonn aon Oifigeach Iomchuí ceaptha, áirítear gurb é ceannaire an pháirtí an tOifigeach Iomchuí.

Sa chás go mbíonn iarrthóirí san iomaíocht i dtoghchán don Dáil nó do Pharlaimint na hEorpa ag páirtí polaitiúil, tá dlite ar an bpáirtí, de réir na bhforálacha in alt 28(1)(a) an Achta, “gníomhaire náisiúnta” a cheapadh (féach leathanach ar leithligh maidir leis na dualgais a bhaineann leis an ngíomhaire náisiúnta faoin Acht). Sa chás nach bhfuil gníomhaire náisiúnta ceaptha, áirítear an tOifigeach Iomchuí a bheith ina ghníomhaire náisiúnta ag an bpáirtí agus is é atá freagrach as dul i gcostas toghcháin thar ceann an pháirtí sa toghchán. Tá dlite ar an Oifigeach Iomchuí, mar ghníomhaire náisiúnta, Ráiteas faoi Chostais Toghcháin a chur ar fáil do Choimisiún na gCaighdeán.

Tá breis eolais sna cáipéisí seo a leanas maidir leis na dualgais a bhaineann leis an Oifigeach Iomchuí faoin Acht:

• Treoirlínte do Pháirtithe Polaitiúla maidir leis na bearta atá le déanamh i leith síntiús agus síntiúis thoirmeasctha.
• Treoirlínte do pháirtithe polaitiúla maidir le hAirgeadú ón Státchiste faoin Acht Toghcháin, 1997.
• Treoirlínte maidir le corrthoghcháin 11 Márta 2005 don Dáil i gCill Dara Thuaidh agus sa Mhí